ທ່ານສີຈິ້ນຜິງພົບປະກັບເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ປະທານປະເທດຫວຽດນາມ

ຕອນເຊົ້າວັນທີ 19 ສິງຫານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນໄດ້ພົບປະກັບທ່ານໂຕເລີ່ມ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ປະທານປະເທດຫວຽດນາມຢູ່ຫໍສະພາປະຊາຊົນທີ່ນະຄອນຫຼວງປັກກິ່ງໃນໂອກາດທີ່ທ່ານເດີນທາງມາຢ້ຽມຢາມຈີນທາງລັດຖະກິດ.

ທ່ານສີຈິ້ນຜິງກ່າວວ່າ, ຍິນດີຕ້ອນຮັບສະຫາຍໂຕເລີ່ມ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ປະທານປະເທດຫວຽດນາມມາຢ້ຽມຢາມຈີນທາງລັດຖະກິດ, ຂໍຊົມເຊີຍ ອີກເທື່ອໜຶ່ງຕໍ່ສະຫາຍທີ່ໄດ້ຮັບເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ. ຫຼັງຈາກຂຶ້ນຮັບຕຳແໜ່ງເລຂາທິການໃຫຍ່ແລ້ວ ສະຫາຍມາຢ້ຽມຢາມຈີນເປັນປະເທດທຳອິດ, ໄດ້ສະແດງໃຫ້ເຫັນວ່າ ສະຫາຍໄດ້ໃຫ້ຄວາມສຳຄັນເປັນຢ່າງສູງຕໍ່ສາຍພົວພັນຂອງສອງພັກສອງລັດ, ໄດ້ສ່ອງແສງໃຫ້ເຫັນໃນລະດັບສູງ ແລະ ລັກສະນະຍຸດທະສາດຂອງສາຍພົວພັນຈີນ-ຫວຽດນາມ. ຂ້າພະເຈົ້າຍິນດີຮ່ວມກັບສະຫາຍ ສ້າງສາຍພົວພັນການເຮັດວຽກທີ່ດີ ແລະ ມິດຕະພາບສ່ວນຕົວ, ຮ່ວມກັນນຳພາການສ້າງຄູ່ຮ່ວມຊາຕາກຳຈີນ-ຫວຽດນາມໃຫ້ລົງສູ່ລວງເລິກຢ່າງໜັກແໜ້ນ.

ທ່ານສີຈິ້ນຜິງກ່າວຕື່ມວ່າ, ໃນຖານະເປັນສອງພັກຄອມມູນິດທີ່ກຳອຳນາດຢູ່ໃນໂລກປັດຈຸບັນນີ້, ສອງພັກຈີນ ແລະ ຫວຽດນາມຄວນຮັກສາອຸດົມການແຕ່ຫົວທີທີ່ມີໄມຕີຈິດຕໍ່ກັນ, ສືບທອດມິດຕະພາບອັນເປັນມູນເຊື້ອ, ຈົດຈຳພາລະກຳຮ່ວມກັນ, ຍຶດໝັ້ນການນຳພາຂອງພັກຄອມມູນິດ ແລະ ລະບອບສັງຄົມນິຍົມ, ລົງເລິກການສ້າງຄູ່ຮ່ວມຊາຕາກຳຈີນ-ຫວຽດນາມທີ່ມີລັກສະນະຍຸດທະສາດຢ່າງຕໍ່ເນື່ອງ, ຮ່ວມກັນຊຸກຍູ້ການພັດທະນາພາລະກິດສັງຄົມນິຍົມຂອງໂລກ, ເຊື່ອໝັ້ນວ່າເສັ້ນທາງຂອງພວກເຮົາຈະນັບມື້ນັບຂະຫຍາຍກວ້າງອອກ.

.md_Laos_page01 .md_hd{width:300px;}

ຄໍລຳ

ຮູບພາບ

ວີດີໂອ

ນັກຮຽນຣັດເຊຍສຳຜັດກັບມົນສະເໜ່ທາງວັດທະນະທຳທີ່ເປັນມູນເຊື້ອຂອງຈີນ

ອັດງານກິລາໂອລິມປິກລະດູຮ້ອນຄັ້ງທີ 33 ຢູ່ປາຣີ